जेठ २६, काठमाडौँ | वैदेशिक रोजगार विभागले वैदेशिक रोजगार अन्तर्गत अभिमुखीकरण तालिम प्रदायक संस्थाहरुको ध्यानाकर्षण गराएको छ । कोरोना महामारीको समयमा स्वास्थ्य मापदण्डको ख्याल नगरी केहि संस्थाहरुले अभिमुखीकरण तालिम कक्षा संचालन गरेको भन्दै विभागले ध्यानाकर्षण गराएको हो ।
बिभागका शाखा अधिकृत मात्रिका सापकोटाद्वारा हस्ताक्षर भएको सूचना अनुसार कोरोना महामारीको समयमा कोभिड १९ फैलन नदिन स्वास्थ्य मापदण्ड अनिवार्य पालना गर्न सचेत गराइएको छ । सापकोटाका अनुसार केहि दिन यता केहि अभिमुखीकरण संस्थाहरुले सामान्य समयमा झैँ ठूलो संख्यामा युवाहरुलाई तालिममा सहभागी गराएको पाइएको बताएका छन् । यसै सम्बन्धमा ध्यानाकर्षण गर्दै वैदेशिक रोजगारमा प्रस्थान पूर्वको अभिमुखीकरण तालिम प्रदायक संस्थाहरु सबैलाई विभागले सचेत गराएको हो ।
बिभागद्वारा जारी सूचनामा भनिएको छ 'हालको अवस्थामा कतिपय इजाजतपत्रवाला संस्थाहरुले जनस्वास्थ्य सुरक्षाका मापदण्डहरुको पालना नगरी अभिमुखिकरण तालिम कक्षा संचालन गरिरहेको विषयमा बिभागको ध्यानाकर्षण भएको व्यहोरा जानकारी गराइन्छ । उक्त सम्बन्धमा विभागले थप निगरानी तथा छानवीन गर्ने व्यहोरा समेत सबैलाई सूचित गरिन्छ ।'
बिभागले यस सम्बन्धमा अहिले वैदेशिक रोजगार अभिमुखिकरण तालिम दिन हतार नगर्न भन्दै यस सम्बन्धमा थप स्पष्टिकरण दिएको छ 'हाल वैदेशिक रोजगार विभागले अनलाइन मार्फत हुने पुन: श्रम स्वीकृति सम्बन्धि सेवा सुचारु राखेको र सो बाहेक अत्यावश्यक परेकाहरुको हकमा अत्यन्तै सिमित मात्र नयाँ श्रम स्वीकृति सम्बन्धि सेवा प्रवाह शुरु गरेको छ ।'
पछिल्लो समय कोरोनाको कारण निषेधाज्ञा जारी नै रहेको, उडानहरु सामान्य बेलामा जस्तो खुलिनसकेको र वैदेशिक रोजगारमा तत्कालै गइहाल्न पाइने अवस्था समेत नरहेको भन्दै बिभागले अभिमुखीकरण तालिम प्रदायक संस्थाहरुलाई स्वास्थ्य मापदण्डको पूर्ण रुपमा ख्याल गर्न, सामान्य अवस्थामा झैँ ठूलो समूहमा राखेर तालिम नदिन सचेत गराएको छ ।
